ہیک واٹس ایپ واپس کیسے لیا جائے اور مستقبل میں کیسے بچاجائے؟

پاکستان میں واٹس ایپ ہیکنگ کے واقعات میں خطرناک حد تک اضافہ ہو چکا ہے۔ روزانہ عام شہری، بزرگ خواتین، دکاندار اور کاروباری افراد اپنے واٹس ایپ اکاؤنٹس سے محروم ہو رہے ہیں۔

اس  تحریر میں ہم آپ کو دو اہم باتوں پر رہنمائی فراہم کریں گے: ہیک واٹس ایپ ہیک  واپس کیسے حاصل کیا جا سکتا ہے؟ اور مستقبل میں واٹس ایپ کو دوبارہ ہیک ہونے سے کیسے محفوظ رکھا جا سکتا ہے؟

واٹس ایپ ہیک کیسے ہوتا ہے

پاکستان میں عام طور پر واٹس ایپ ہیکنگ کے لیے استعمال کیے جانے والے طریقے یہ ہیں کہ آپ کو واٹس ایپ یا کسی جاننے والے کے نام سے پیغام آتا ہے کہ آپ کا اکاؤنٹ ویری فائی کرنا ہے یا یہ چھ ہندسوں کا کوڈ بھیج دیں۔

بعض اوقات یہ پیغام کسی دوست یا رشتہ دار کے نمبر سے آتا ہے جس کا اکاؤنٹ پہلے ہی ہیک ہو چکا ہوتا ہے۔ لوگ لاعلمی میں یا جلدی میں یہ تصدیقی کوڈ شیئر کر دیتے ہیں۔ بس اسی ایک غلطی سے ہیکر آپ کے واٹس ایپ کا مکمل کنٹرول حاصل کر لیتا ہے۔

یاد رکھیں: واٹس ایپ کا تصدیقی کوڈ کبھی بھی کسی کے ساتھ شیئر نہ کریں۔ نہ واٹس ایپ خود مانگتا ہے، نہ کوئی ادارہ، نہ کوئی دوست۔

اگر آپ کا واٹس ایپ ہیک ہو جائے تو فوری کیا اقدامات کرنے چاہئیں؟

اگر آپ کا واٹس ایپ ہیک ہو چکا ہے تو گھبرائیں نہیں۔ اپنے موبائل فون سے واٹس ایپ ڈیلیٹ کریں اور دوبارہ انسٹال کریں۔ ساتھ ہی اپنے دوستوں اور خاندان کو کسی اور نمبر سے اطلاع دیں کہ اگر آپ کے نام سے کوئی مشکوک پیغام آئے تو اس پر ہرگز یقین نہ کریں۔

اپنا وہی موبائل نمبر درج کریں جو واٹس ایپ پر رجسٹرڈ تھا۔ واٹس ایپ آپ کو ایس ایم ایس یا کال کے ذریعے چھ ہندسوں کا تصدیقی کوڈ بھیجے گا، اسے درج کریں۔ زیادہ تر کیسز میں اسی مرحلے پر ہیکر کی رسائی ختم ہو جاتی ہے کیونکہ واٹس ایپ ایک وقت میں صرف ایک ڈیوائس کو اجازت دیتا ہے۔

اگر تصدیقی کوڈ نہ آ رہا ہو یا پن لگا دیا گیا ہو؟

اگر ہیکر نے آپ کے اکاؤنٹ پر ٹو اسٹیپ ویریفیکیشن پن لگا دیا ہے اور آپ لاگ اِن نہیں ہو پا رہے تو واٹس ایپ آپ کو آپشن دیتا ہے کہ 7 دن بعد دوبارہ کوشش کریں۔ 7 دن بعد واٹس ایپ آپ کو بغیر پن کے لاگ اِن کرنے کی اجازت دیتا ہے، لیکن صرف اسی نمبر پر۔

اس دوران یہ باتیں لازمی یاد رکھیں:

• سم کارڈ اپنے پاس اور فعال رکھیں
• نمبر بند یا معطل نہ ہونے دیں
• واٹس ایپ بار بار انسٹال نہ کریں

اگر آپ نے ای میل ایڈریس شامل نہیں کیا اور پن بھی یاد نہیں، تب بھی واٹس ایپ 7 دن بعد آپ کا اکاؤنٹ بحال کر دیتا ہے، بس شرط یہ ہے کہ سم کارڈ آپ کے پاس ہو۔ سم کارڈ سب سے اہم ہے۔

اضافی طور پر آپ اپنے نمبر اور مسئلے کی تفصیل کے ساتھ واٹس ایپ سپورٹ کو ای میل بھی کر سکتے ہیں۔

اکاؤنٹ بحال ہوتے ہی اپنے تمام رابطوں کو پیغام بھیجیں:

"میرا واٹس ایپ ہیک ہو گیا تھا، براہ کرم پہلے بھیجے گئے کسی بھی پیغام یا درخواست کو نظر انداز کریں۔”

اس سے آپ کے دوست اور خاندان مزید نقصان سے بچ سکتے ہیں۔

مستقبل میں ہیک واٹس ایپ سے خود کو کیسے بچایا جا سکتا ہے

• ٹو اسٹیپ ویریفیکیشن لازمی فعال کریں: سیٹنگز > اکاؤنٹ > ٹو اسٹیپ ویریفیکیشن میں جا کر چھ ہندسوں کا پن سیٹ کریں جو صرف آپ کو یاد ہو۔
• ای میل ایڈریس ضرور شامل کریں تاکہ پن ری سیٹ کیا جا سکے اور اکاؤنٹ جلد بحال ہو سکے۔
• تصدیقی کوڈ کبھی کسی کے ساتھ شیئر نہ کریں، چاہے وہ دوست ہو یا کسی ادارے کے نام سے پیغام آئے۔
• جعلی لنکس اور آفرز سے بچیں: مفت انٹرنیٹ، انعامات، سرکاری یا بینک کے جعلی پیغامات پر کلک نہ کریں۔
• لنکڈ ڈیوائسز چیک کریں: سیٹنگز > لنکڈ ڈیوائسز میں جا کر اگر کوئی نامعلوم ڈیوائس نظر آئے تو فوراً لاگ آؤٹ کریں۔
• فون لاک اور بایومیٹرک استعمال کریں: اگر فون محفوظ نہیں ہوگا تو واٹس ایپ بھی محفوظ نہیں رہے گا۔

یاد رکھیں

واٹس ایپ ہیکنگ کوئی تکنیکی جادو نہیں بلکہ زیادہ تر انسانی غلطی کی وجہ سے ہوتی ہے۔ تھوڑی سی آگاہی اور احتیاط سے آپ خود کو، اپنے گھر والوں کو اور اپنے دوستوں کو محفوظ رکھ سکتے ہیں۔