سعودی عرب نے کھجور سے تیار کردہ نیا کولہ میلاف کولا متعارف کرایا ہے، جو روایتی میٹھے اجزاء جیسے مکئی کے شیرے اور گنے کی چینی کے برعکس کھجور کے قدرتی مٹھاس سےبنا ہے۔ یہ مشروب ریاض ڈیٹ فیسٹیول میں ثرث المدینہ کے سی ای او بندر القحطانی اور سعودی وزیر زراعت عبدالرحمن الفاضلی نے متعارف کرایا۔
میلاف کولا کو اعلیٰ معیار کی کھجوروں سے تیار کیا گیا ہے، جو مشرق وسطیٰ میں ایک اہم پھل ہے اور اپنے غذائیت کے بھرپور فوائد کے لیے جانا جاتا ہے۔ کھجوروں میں فائبر، اینٹی آکسیڈنٹس، اور ضروری معدنیات جیسے میگنیشیم اور پوٹاشیم بھرپور مقدار میں موجود ہوتے ہیں، جو اس مشروب کو صحت بخش بنیاد فراہم کرتے ہیں۔
روایتی سوڈاز سے مختلف، میلاف کولا میں کوئی اضافی چینی نہیں ہے، اور یہ ذائقے میں بھی کسی کمی کے بغیر ایک صحت مند متبادل فراہم کرتا ہے۔
سی ای او القاحطانی کا کہنا تھا کہ یہ کولہ ایک انوکھا پروڈکٹ ہے جو کھجور کے صحت بخش فوائد کو کلاسک کولہ کے تازہ ذائقے کے ساتھ یکجا کرتا ہے۔ یہ سوڈا پینے والوں کے لیے ایک صحت مند آپشن ہے۔
میلاف کولاکا آغاز سعودی عرب کی ایک وسیع تر مہم کا حصہ ہے جس کا مقصد مقامی سطح پر حاصل کردہ پائیدار مصنوعات کو فروغ دینا ہے، جو ملک کے ویژن 2030 کے مطابق ہے، جس کا مقصد معیشت کو متنوع بنانا اور سماجی و ثقافتی ترقی کو بڑھانا ہے۔
مزید پڑھیں: پی آئی اے یورپ کیلئے پروازیں شروع کرنے کو تیار
ثرث المدینہ، جو سعودی پبلک انویسٹمنٹ فنڈ کی ذیلی کمپنی ہے، نے بتایا کہ میلاف کولابین الاقوامی فوڈ سیفٹی معیارات پر پورا اترتا ہے اور اس میں مقامی طور پر حاصل کردہ کھجوروں کا استعمال اسے ماحولیاتی طور پر پائیدار بناتا ہے۔
کمپنی نے اس مشروب کو علاقائی اور عالمی مارکیٹوں میں متعارف کرانے کے منصوبے کا بھی اعلان کیا ہے، جس کا مقصد عالمی سطح پر کھجور کو صرف ایک روایتی اسنیک کے طور پر دیکھنے کے تصورات کو تبدیل کرنا ہے۔
کمپنی کے ترجمان نے کہا کہ میلاف کولاصرف آغاز ہے۔ ہم مختلف پروڈکٹس پر کام کر رہے ہیں جو عالمی سطح پر کھجور کے استعمال کے طریقے کو انقلاب لائیں گے۔
