پاکستان تحریک انصاف (پی ٹی آئی) کی پولیٹیکل کمیٹی نے شیر افضل مروت کی جگہ شیخ وقاص اکرم کو پبلک اکاؤنٹس کمیٹی (پی اے سی) کے چیئرمین شپ کیلئے چن لیا۔ یوں شیر افضل مروت کو اپنی ہی پارٹی نے اہم عہدے کی دوڑ سے باہر نکال دیا۔اس پیشرفت کے بعد، مروت اور سنی اتحاد کونسل کے سربراہ حامد رضا پی اے سی کی چیئرمین شپ کے لیے دوڑ کا حصہ نہیںرہے ہیں۔
پی ٹی آئی کے بانی عمران خان نے اس سے قبل شیر افضل مروت کو پی اے سی کے چیئرمین کے طور پر چنا تھا۔ پارٹی قیادت اور اپوزیشن کی جانب سے مروت کی نامزدگی پر تنقید کے بعد سابق وزیراعظم نے بعد میں سنی اتحاد کونسل کے سربراہ صاحبزادہ حامد رضا کو پی اے سی کی چیئرمین شپ کے لیے نامزد کیا۔
گزشتہ ہفتے پی ٹی آئی کے سیکرٹری جنرل اور قومی اسمبلی میں قائد حزب اختلاف عمر ایوب خان نے پارٹی کے بانی کی طرف سے ان کی توثیق کا حوالہ دیتے ہوئے مروت کی تقرری کی وکالت کی۔
مزیدپڑھیں:خیبر پختونخوا حکومت کی شیر افضل مروت کے خلاف بڑی کارروائی
اسد قیصر، وقاص اکرم، جنید اکبر، اور زین قریشی ان لوگوں میں شامل تھے جنہوں نےشیر افضل مروت کی نامزدگی کی مخالفت کی اور پی اے سی کی چیئرمین شپ کے لیے لابنگ کر رہے تھے۔اس کے علاوہ پارٹی کی دیگر سینئر قیادت نے بھی عمران کے فیصلے کی مخالفت کی۔
ذرائع نے بتایا کہ پی ٹی آئی کی سیاسی کمیٹی کا اجلاس جمعہ کی شب اسلام آباد میں اپنے نئے چیئرمین کی سربراہی میں نامزدگی پر بات چیت کے لیے ہوا۔ عمر ایوب کی سربراہی میں 19 رکنی کمیٹی میں سے نو نے شیخ وقاص اور سات نے مروت کو ووٹ دیا۔شیر افضل مروت نے اپنے خلاف اقدام کو ’پی ٹی آئی اسٹیبلشمنٹ کی سازش‘ قرار دیا اور اس کی وجہ اپنی مقبولیت کو قرار دیا۔
