دنیا بھر میں ایک بار پھر کورونا وائرس کے نئے ویرینٹ کے سر اٹھانے کی خبریں آنے کے بعد یہ وائرس ایک بار پھر پاکستان پہنچ گیا ہے۔ گزشتہ دنوں اسلام آباد، لاہور سمیت ملک کے مختلف شہروں میں ایسے کیسز رپورٹ ہوئے جن میں علامات کورونا سے ملتی جلتی تھیں۔
طبی ماہرین کا کہنا تھا کہ لوگوں نے ٹیسٹ کرانا چھوڑ دیئے ہیں ، اب کورونا دوبارہ سر اٹھا رہا ہے لیکن ہم اسکی تشخیص نہیں کرا رہے جس کی وجہ سے یہ پھیل رہا ہے۔ تاہم اب کراچی میں باقاعدہ طور پر کیسز سامنے آنا شروع ہو گئے ہیں۔
محکمہ صحت سندھ نے جمعہ کے روز کراچی ایئرپورٹ پر بیرون ملک سے آنے والے دو مسافروں میں کوویڈ 19 کی ایک نئی قسم کی موجودگی کی تصدیق کی۔ متاثرہ مسافروں میں سے ایک، قاسم آباد ڈسٹرکٹ، حیدرآباد کا ایک 53 سالہ فرد، کوالالمپور سے کراچی پہنچا۔ ان کی مستقل رہائش ضلع سانگھڑ میں ہے۔دوسرا مسافر، جس کی عمر 60 سال ہے اور ڈی جی خان، پنجاب کا رہائشی ہے، جدہ سے آیا تھا۔ دونوں افراد کو سختی سے ہدایت کی گئی ہے کہ وہ گھریلو قرنطینہ کے اقدامات پر عمل کریں۔
تاہم محکمہ صحت سندھ نے واضح کیا کہ صوبہ سندھ میں مختلف قسم کا کوئی کیس رپورٹ نہیں ہوا ہے۔محکمہ صحت سندھ کا کہنا ہے کہ اس نے کورونا کے نئے ویرینٹ سے نمٹنے کے لیئے حفاظتی اقدامات کو تیز کر دیا ہے اور وہ اس معاملے پر چو کس ہیں۔محکمہ صحت پنجاب کو بھی احتیاطی تدابیر کے طور پر الرٹ کر دیا گیا ہے۔
مزید پڑھیں: اسلام آباد ہائیکورٹ کا میڈیکل طلبہ کو بڑا ریلیف
اطلاعات کے مطابق، CoVID-19 کی نئی شکل، اگرچہ خطرناک نہیں سمجھی جاتی، سردی، کھانسی اور سر درد جیسی علامات پیش کرتی ہے۔ مختلف ہوائی اڈوں پر بیرون ملک سے آنے والے مشتبہ مسافروں کی شناخت اور جانچ کے لیے کوششیں جاری ہیں۔
اس سے قبل، وفاقی حکومت نے متعدد ممالک میں مشاہدہ کیے جانے والے نئے ویریئنٹ کے ممکنہ پھیلاؤ کے پیش نظر کووِڈ ویکسین کی 500,000 خوراکیں خریدنے کا فیصلہ کیا تھا۔
امریکہ سے فائزر ویکسین کی خریداری کی حکمت عملی ایمرجنسی آپریشن سینٹر (EOC) کے تکنیکی مشاورتی گروپ کی سفارشات کی بنیاد پر وضع کی گئی تھی۔حکام نے تصدیق کی ہے کہ وفاقی حکومت نے مختلف ممالک میں وائرس کی ایک نئی قسم کی ممکنہ بحالی کے درمیان کوویڈ 19 ویکسین کی 500,000 خوراکیں خریدنے کا فیصلہ کیا ہے۔
JN.1 ویرینٹ کے ابھرتے ہوئے خطرات کے بعد ایمرجنسی آپریشن سنٹر (EOC) کے ٹیکنیکل ایڈوائزری گروپ کی سفارشات پر امریکہ سے فائزر ویکسینز کی خریداری کا منصوبہ بنایا گیا تھا۔آنے والے ہفتے میں ویکسین کی تقریباً 200,000 خوراکیں ملک میں پہنچ جائیں گی، جبکہ باقی اگلے مرحلے میں دستیاب ہوں گی۔
