8 ماہ سے زائد جیل میں گزارنے اور سپریم کورٹ تک الیکشن لڑنے کے حق تک جانی والی صنم جاوید خان نے الیکشن لڑنے کا حق ملنے کے بعد الیکشن سے دستبرداری کا اعلان کر دیا ہے۔ وہ مریم نواز کے مقابلے میں این اے 119 سے امیدوار تھیں اور یہ بات مریم نواز کیلئے بھی کافی پریشان کن تھی۔تاہم سوال پیدا ہوتا ہے کہ یہ حق ملنے کے بعد صنم جاوید الیکشن سے دستبردار کیوں ہوئیں؟
تفصیلات کے مطابق پی ٹی آئی نے ابتدائی طور پر اس حلقے سے صنم جاوید کو ٹکٹ دیا تھا جبکہ کورنگ امیدوار کے طور پر میاں عباد فاروق کے بھائی میاں شہزاد فاروق کو رکھا گیا تھا۔ کاغذات جمع ہونے سے لیکر سکروٹنی تک صنم کو مشکل حالات سے گزرنا پڑا۔ ہائیکورٹ تک سے ریلیف نہ ملنے اور وقت ختم ہونے کی وجہ سے پارٹی نے میاں شہزاد فاروق کو بطور امیدوار میدان میں اتار دیا۔
تاہم سپریم کورٹ سے صنم جاوید کو الیکشن لڑنے کی اجازت ملنے کے بعد پارٹی کیلئے ایک نئی مشکل پیدا ہوگئی تھی کیونکہ الیکشن سے دس دن قبل امیدوار تبدیل کرنا حلقے کی عوام کیلئے پریشانی بن سکتا تھا۔ ایسے میں صنم جاوید الیکشن سے دستبردار ہو گئیں۔
مزید پڑھیں: مریم نواز صنم جاوید کا مقابلہ کرنے سے کیوںکتر ا رہی ہیں؟
صرف الیکشن سے دستبردار نہیں ، صنم نے پارٹی کیلئے قربانی کی نئی مثال بھی قائم کردی۔ ٹویٹر اکاؤنٹ پر صنم جاوید کی الیکشن سے دستبرداری کی خبر دیتے ہوئے ان کی بہن فلک جاوید نے اعلان کیا کہ ہم میاں شہزاد فاروق کی کمپین صنم کی کمپین سمجھ کر چلائیں گے۔
ہم میاں شہزاد فاروق کی الیکشن کمپین صنم کی کمپین سمجھ کر چلائیں گے پشپا کو ہر حال میں شکست دینی ہے۔۔۔!!!
انشاء اللہ
— Falak Javaid Khan (@falakjavaidkhan) January 28, 2024
یہی نہیں انہوں نے گزشتہ روز کی ریلی کی ویڈیو بھی شیئر کی جس میں دیکھا جا سکتا ہے کہ صنم جاوید کی چھوٹے بیٹے شہزاد فاروق کی الیکشن کمپین میں حصہ لے رہے ہیں۔ ویڈیو پوسٹ کرنے والے صارف نے لکھا کہ عمار فاروق کی جگہ آج صنم کے بیٹے کو ریلی میں بھیج کر شاندار پیغام دیا گیا ہے۔
پارٹی کے سوشل میڈیا ٹیم کے سرگرم نام اظہر مشوانی نے فلک جاوید کے صنم جاوید کے الیکشن سے دستبرداری کے ٹویٹ کو ریٹویٹ کرتے ہوئے لکھا کہ این اے 119 پارٹی کیلئے بہت مشکل فیصلہ تھا۔ ایک طرف ملٹری کورٹ میں ٹرائل بھگتنے والی میاں عباد فاروق کے بھائی شہزاد فاروق اور دوسری طرف بہادر بہن صنم جاوید۔
پارٹی کےلیے NA-119 کا فیصلہ کافی مشکل تھا۔۔
ایک طرف ملٹری کورٹ میں قید عباد فاروق کا بھائی شہزاد فاروق دوسری طرف ہماری بہادر بہن صنم جاویدلیکن انشأللہ ہم جلد صنم جاوید کو ریزرو سیٹ پر پنجاب اسمبلی میں دیکھیں گے https://t.co/28aENKR58E
— Azhar Mashwani (@MashwaniAzhar) January 28, 2024
ان کا مزید کہنا تھا کہ آپ جلد ریزرو سیٹ پر صنم جاوید کو پنجاب اسمبلی میں دیکھیں گے۔ یاد رہے کہ صنم جاوید ایک عام پارٹی کارکن تھیں۔ تاہم 9 مئی کے بعد انکی گرفتاری اور ڈٹے رہنے اور مریم نواز کے مقابل الیکشن لڑنے کی جدو جہد نے انہیں ایک بڑے لیڈر کا رتبہ دے دیا ہے۔
