26 ویں آئینی ترمیم کے بعد تشکیل دیا گیا آئینی بینچ حرکت میں آگیا۔ پی آر او آفس کی جانب سے پریس ریلیز جاری کر دی گئی۔
پریس ریلیز میں لکھا گیا کہ آرٹیکل 191A (4) کے تحت تشکیل دی گئی کمیٹی کا اجلاس آج مورخہ 12 نومبر 2024 کو سپریم کورٹ اسلام آباد میں منعقد ہوا۔ اجلاس کی صدارت معزز جسٹس امین الدین خان (سربراہ آئینی بینچ) نے کی، جس میں آئینی بینچ کی تشکیل سے متعلق امور پر غور کیا گیا۔ اجلاس میں معزز جسٹس جمال خان مندوخیل اور معزز جسٹس محمد علی مظہر نے شرکت کی (معزز جسٹس محمد علی مظہر نے ٹیلیفونک طور پر کراچی سے شرکت کی)۔
اجلاس کے دوران، رجسٹرار آفس نے کمیٹی کو ان زیر التوا مقدمات کے بارے میں آگاہ کیا جو آئینی بینچ کے دائرہ اختیار میں آتے ہیں۔ مکمل غور و خوض کے بعد، کمیٹی نے یہ فیصلہ کیا کہ ترجیح سب سے پرانے مقدمات کو دی جائے گی۔
مزید پڑھیں:آئینی بینچ کے سربراہ جسٹس امین الدین خان نے کمان سنبھال لی
معزز جسٹس عائشہ اے ملک کی 14 اور 15 نومبر 2024 کو عدم دستیابی کے پیش نظر، یہ طے کیا گیا کہ ان تاریخوں میں تمام دستیاب ججز پر مشتمل ایک بینچ تشکیل دیا جائے گا تاکہ مقدمات کی سماعت کی جا سکے۔ رجسٹرار آفس کو ہدایت کی گئی ہے کہ ان مقدمات کو بینچ کے سامنے سماعت کے لیے مناسب طور پر فہرست میں شامل کیا جائے۔
کمیٹی نے مزید فیصلہ کیا کہ آئندہ اجلاس بدھ، 13 نومبر 2024 کو 12:30 بجے سپریم کورٹ اسلام آباد میں دوبارہ منعقد ہوگا، جب معزز جسٹس محمد علی مظہر اسلام آباد میں تشریف لائیں گے تاکہ مزید مشاورت کی جا سکے۔
تاہم صحافی مطیع اللہ جان نے انکشاف کیا ہے کہ مخصوص نشستوں اور 26 ویں آئینی ترمیم کے تحت درخواستوں کی سماعت فی الوقت فوری سماعت کیلئے مقرر ہونے کا امکان نہیں ہے۔
