وہ ٹرک ڈرائیور جو یوٹیوب سے لاکھوں کماتا ہے

یوٹیوب میں اریجنل مواد کو صارفین کی جانب سے بہت پسند کیا جاتا ہے۔ اس مواد کی پذیرائی بھی بہت ہوتی ہے اور ایسے چینلز کو جلد شہرت بھی حاصل ہو جاتی ہے۔

ایک اور قابل ذکر بات یہ بھی ہے کہ یوٹیوب پر سفارش نہیں چلتی۔ ایک طرف اگر کوئی مشہور شخصیت ہے ، لیکن وہ کسی کا کانٹینٹ اٹھا کر اپنا چینل چلا رہی تو یوٹیوب چینل کبھی اس کی شہرت میں اضافے کا سبب نہیں بنے گا۔

اسی طرح اگر کوئی شخص بہترین سٹوڈیو یا کیمرہ نہیں رکھتا اور بھلے  یوٹیوب ویڈیو بنانے والا شخص کتنا ہی سادہ کیوں نہ ہو لیکن اس کا کانٹینٹ اوریجنل ہے اور عوام کی پسند کا ہے اس کی مقبولیت کا کوئی توڑ نہیں ہوتا۔

یوٹیوب سے لاکھوں کمانے والا ٹرک ڈرائیور:

ایسی ہی خوش قسمتی ایک بھارتی شخص نےپائی جو پیشے کے اعتبار سے ٹرک ڈرائیور تھا لیکن اچانک سفر کے دوران اور عام زندگی میں اس نے کھانے کی ویڈیوز بنانا شروع کیں ۔

بعد ازاں اس ڈرائیور نے ویڈیوز یوٹیوب پر اپلوڈ کرنا شروع کیں جسے صارفین کی جانب سے بہت پسند کیا جانے لگا اور اب وہ یوٹیوب سے لاکھوں کمانے لگا ہے۔

راجیش روانی نامی یہ یوٹیوبر آر راجیش وی لاگز کے نام سے اپنا یوٹیوب چینل چلاتا ہے جس پر وہ کھانے اور ٹرک کے سفر کی ویڈیوز بناتا ہے  جسے صارفین بہت پسند کرتے ہیں۔

راجیش روانی کے مطابق اس کی ٹرک سے آمدن تو شاید 25 سے 30 ہزار بھارتی روپے ہو گی لیکن یوٹیوب سے اس کی آمدن 4 سے 5 لاکھ تک پہنچ جاتی ہے۔

راجیش نے بتایا کہ ایک ماہ میں اس کے پاس 10 لاکھ بھارتی روپے کی یوٹیوب آمدن بھی ہوئی۔

مزید پڑھیں:ایپل واچ سے خاتون کی جان بچانے والا ڈاکٹر

اس ٹرک ڈرائیور نے ایک پوڈ کاسٹ میں بتایا کہ پہلی ویڈیو اس نے صرف وائس اوور سے بنائی اور اپنا چہرہ نہیں دکھایا۔

تاہم لوگوں کے اصرار کے بعد اس کے بیٹے نے اس کی ویڈیو بنائی جو تھوڑے عرصے میں لاکھوں ویوز لے گئی اور یوں اسکی مقبولیت کا آغاز ہو گیا۔

قسمت کے دھنی اس ٹرک ڈرائیور کے سبسکرائبرز کی تعداد  اس وقت 2  ملین سے زائد پہنچ چکی ہے جبکہ کھانے پینے کی اس کی ویڈیوز کو لاکھوں ویوز ملتے ہیں جو اسکی آمدن کا ذریعہ بنتے ہیں۔

پاکستان میں راجیش  وی لاگز کا متبادل کون؟

کھانے کی ویڈیوز ہر شخص شوق سے دیکھتا ہے اور آگے بھی شیئر کرتا ہے۔ ایسی ہی ویڈیوز کیلئے پاکستان میں مبشر صدیق نامی یوٹیوبر ہیں اور انکی کامیابی کی داستان بھی کچھ ایسی ہی ہے۔

راجیش کے طرز کے پاکستانی وی لاگر کی بات کر لی جائے تو مبشر صدیق اس کی اچھی مثال ہیں۔ مبشر صدیق بھی ایک سادہ شخص تھا جس نے کھانا بنانے کی ویڈیوز یوٹیوب پر ڈالنا شروع کیں۔

آج مبشر صدیق کے فالورز کی تعداد 4 لاکھ سے زائد ہے جبکہ ان کی کئی ویڈیوز ملین ویوز کراس کر جاتی ہیں۔ ان کی کامیابی کا واحد راز اوریجنل کانٹینٹ تخلیق کرنا ہے۔