محکمہ موسمیات نے پیش گوئی کی ہے کہ مغربی ہواؤں کے باعث ملک کے مختلف حصوں میں کل سے بارش اور برفباری کا امکان ہے۔اس موسمی تبدیلی کے باعث ملک بھر میں سردی کی شدت میں اضافے کا امکان ہے۔
ایڈوائزری کے مطابق پہاڑی علاقے جیسے ہنزہ، سکردو، نیلم، چترال، ملاکنڈ، اور ایبٹ آباد میں 14 دسمبر تک بارش اور برفباری متوقع ہے۔ اس دوران مری، گلیات، اٹک، چکوال، گوجرانوالہ، اور لاہور میں بھی بارش کی پیش گوئی کی گئی ہے۔
سردی کی لہر کی وارننگ
محکمہ موسمیات نے خبردار کیا ہے کہ 8 سے 14 دسمبر تک درجہ حرارت میں نمایاں کمی متوقع ہے، جس کے تحت پنجاب، خیبر پختونخوا، کشمیر، اور گلگت بلتستان میں پارہ معمول سے چھ ڈگری کم ہو سکتا ہے۔ بلوچستان میں درجہ حرارت موسمی اوسط سے پانچ سے سات ڈگری تک کم ہو سکتا ہے۔
پنجاب اور بلوچستان کے میدانی علاقوں میں دھند اور سرد ہوائیں بھی اثرانداز ہونے کا امکان ہے۔ مشورے میں ان علاقوں کے رہائشیوں کو ہدایت کی گئی ہے کہ شدید سرد موسم کے دوران غیر ضروری طور پر باہر نکلنے اور سفر کرنے سے گریز کریں۔
مزید پڑھیں:گاڑی دھونے کیلئے پائپ استعمال کرنے والے ہوشیار، بھاری جرمانہ نافذ
محکمہ موسمیات نے متعلقہ اداروں کو ہدایت دی ہے کہ وہ شدید موسم کی صورتحال سے نمٹنے کے لیے ہائی الرٹ رہیں اور کسی بھی ہنگامی حالت سے نمٹنے کے لیے تیار رہیں۔
دوسری جانب ملک میں سردی کی آمد کے ساتھ ہی گیس کی لوڈ شیڈنگ میں اضافہ اور پریشر میں کمی دیکھی گئی ہے۔
