پاکستان کو اپنے مشہور پرندوں میں سے ایک، الیگزینڈرین طوطا، کھونے کا خطرہ لاحق ہے، جو پہلے ہی مختلف عوامل، جن میں سے زیادہ تر انسانی پیدا کردہ ہیں، کی وجہ سے عالمی سطح پر تقریباً ناپید پرندوں کی فہرست میں شامل ہے۔
ماہرینِ جنگلی حیات کے مطابق ان پرندوں کی آبادی میں کمی کے اہم عوامل میں مسکن کی تبدیلی، آلودگی، شکار اور غیر قانونی تجارت شامل ہیں۔ ان کے مطابق یہ طوطا پاکستان میں پائے جانے والے تین طوطے کی اقسام میں سب سے زیادہ تعداد میں موجود ہے۔
ایک زمانے میں یہ طوطے ملک کے میدانوں، خاص طور پر نہروں اور پہاڑی دامنوں کے ساتھ، اور یہاں تک کہ کراچی جیسے بڑے شہروں میں بھی کثرت سے پائے جاتے تھے، لیکن اب ان کی آبادی پنجاب اور سندھ کے بالائی علاقوں اور پاکستان اور بھارت کے سرحدی علاقوں، بشمول جموں و کشمیر تک محدود ہو گئی ہے۔
خوبصورت مری ہل اسٹیشن کے درختوں سے بھرے دامن بھی الیگزینڈرین طوطوں کا ایک مسکن ہیں۔
گزشتہ تین دہائیوں میں پنجاب اور سندھ کے زرعی علاقوں میں طوطوں کے پسندیدہ گھونسلے بنانے والے درخت، جیسے شیشم اور برگد کے درخت بڑی تعداد میں کاٹ دیے گئے ہیں، کیونکہ یہ قیمتی لکڑی کے حامل ہیں۔
زرعی حکام نے شیشم کی جگہ یوکلپٹس یعنی کے سفیدے کے درخت لگائے ہیں، جو طوطوں اور دیگر انسان دوست پرندوں کے لیے بے کار ہیں۔
حال ہی میں اسلام آباد وائلڈ لائف مینجمنٹ بورڈ (IWMB) نے وفاقی دارالحکومت میں ایک سروے کیا۔ حیران کن طور پر، دارالحکومت کے آسمانوں میں ایک بھی الیگزینڈرین طوطا نظر نہیں آیا، جو اس پرندے کو درپیش خطرات کی شدت کو ظاہر کرتا ہے۔
ماہرین نے خبردار کیا کہ اگر صورتحال برقرار رہی، تو یہ پرندے شاید ہی بڑے شہروں میں نظر آئیں۔
الیگزینڈریا طوطا پاکستان میں پائے جانے والا سب سے بڑا طوطا ہے۔ یہ سبز رنگ کا ہوتا ہے جس کے پروں پر سرخ نشان ہوتے ہیں اور یہ انسانی بول چال کی نقل کرنے کی صلاحیت رکھتا ہے، جس کی وجہ سے یہ پالتو پرندوں کے شوقین افراد میں بہت مقبول ہے۔
ایک چوزہ شکاری کو 10,000 سے 12,000 روپے تک کما کر دیتا ہے، جبکہ ایک بالغ الیگزینڈرین طوطا پالتو بازاروں میں 50,000 روپے تک فروخت ہوتا ہے۔
مزید پڑھیں:پاکستان میں اب قندھاری انار کم کیوںآتے ہیں؟
پالتو پرندوں کے شوقین افراد کے علاوہ، پیشہ ور افزائش کنندگان بھی جنگلی طوطوں کو خریدتے ہیں تاکہ ان کی نسلوں کے ساتھ کراس بریڈنگ کر کے ان کی قوتِ مدافعت بہتر بنائی جا سکے۔
طوطے بیجوں کی تقسیم میں اہم کردار ادا کرتے ہیں، جبکہ ان کے گھونسلے سردیوں میں کئی جانوروں، خاص طور پر سانپوں اور کچھ گلہریوں کی اقسام کے لیے سردیوں میں رہنے کی جگہ کے طور پر کام کرتے ہیں۔
کئی طوطوں کی اقسام کمی کا شکار ہیں، اور کچھ ناپید ہو چکی ہیں۔ 350 زندہ اقسام میں سے تقریباً 130 اقسام انٹرنیشنل یونین فار کنزرویشن آف نیچر کے مطابق قریب معدوم یا اس سے بدتر حالت میں ہیں۔
گزشتہ سال دسمبر میں، IWMB نے دارالحکومت میں طوطوں کی آبادی میں مسلسل کمی کو روکنے کے لیے ایک یکشن پلان شروع کیا جس کے تحت 50 سے زائد افزائش کنندگان اور 178 افراد (پالتو پرندوں کے شوقین) کو رجسٹر کیا ہے، جو 2,200 سے زیادہ طوطے رکھتے ہیں، تاکہ یہ یقینی بنایا جا سکے کہ وہ ان پرندوں کو مارکیٹ میں فروخت نہیں کر سکتے۔ یہاں تک کہ ان کے چوزے بھی رجسٹر کیے جائیں گے۔
