پاکستان اور سعودی عرب کے درمیان حج 2025 کے لیے معاہدے کو حتمی شکل دے دی گئی ہے۔ ترجمان وزارت مذہبی امور کے مطابق وفاقی وزیر مذہبی امور چوہدری سالک حسین اور سعودی وزیر حج و عمرہ توفیق بن فوزان الربیعہ نے حج 2025 کے معاہدے پر دستخط کیے۔ معاہدے کے تحت اس سال 179,210 پاکستانی فریضہ حج ادا کریں گے۔
اس معاہدے میں پاکستانی حجاج کو بہتر سہولیات فراہم کرنے پر بھی توجہ دی گئی ہے۔ منیٰ میں پاکستانی عازمین کے لیے خصوصی جگہیں مختص کی جائیں گی اور کرایوں میں کمی کی جائے گی۔
حج 2025: عازمین کو کیا سہولیات میسر ہوںگی؟
ترجمان نے مزید کہا کہ سعودی وزیر حج نے پاکستانی عازمین کو بہتر سہولیات کی فراہمی کے لیے مکمل تعاون کی یقین دہانی کرائی ہے۔ حج کے سفر کو مزید قابل رسائی، سہل اور آرام دہ بنانے کے لیے 20 سے 25 دن کا مختصر حج پروگرام متعارف کرایا گیا ہے۔
حجاج کرام کو مدینہ میں 4 سے 8 دنوں کے لیے رہائش کا انتخاب کرنے کا اختیار ہوگا۔ ہر حاجی کو خصوصی طور پر ڈیزائن کیا گیا ایک بیگ ملے گا جس میں پاکستانی پرچم، شناخت کے لیے ایک QR کوڈ اور متعلقہ معلومات ہوں گی۔
وزارت مذہبی امور کے ترجمان نے یہ بھی بتایا کہ ایک خصوصی موبائل ایپ حجاج کرام کو ان کے موبائل فون پر تمام معلومات فراہم کرے گی۔
عازمین اپنے حج گروپ کی تفصیلات، تربیتی نظام الاوقات، پرواز کی معلومات، سعودی عرب میں رہائش، ادائیگیوں، لائیو نقشوں اور زیارت گاہوں کے مقامات کے بارے میں اپ ڈیٹ رہ سکتے ہیں۔
مزید پڑھیں:حج 2025: بغیر محرم کے حج پر جانے والی خواتین کو کیا حلف نامہ دینا ہوگا؟
وفاقی وزیر چوہدری سالک حسین جدہ میں سعودی وزارت حج کے زیر اہتمام چار روزہ بین الاقوامی حج کانفرنس میں بھی شرکت کریں گے۔ حج ایکسپو میں عازمین کو خدمات فراہم کرنے کی ذمہ دار تنظیموں اور کمپنیوں کے ساتھ مزید معاہدے کیے جائیں گے۔
اس سے قبل، وزارت مذہبی امور اور بین المذاہب ہم آہنگی نے پرائیویٹ حج آرگنائزنگ کمپنیوں اور ان کے ذیلی اداروں کو حج 2025 کی بکنگ جمعہ سے شروع کرنے کا اختیار دیا تھا۔وزارت کے ترجمان کے مطابق پرائیویٹ حج سکیم کی بکنگ 10 سے 31 جنوری تک جاری رہے گی۔
ترجمان نے کہا کہ وزارت نے پرائیویٹ سکیم کے تحت مختلف حج پیکجز کی تفصیلات اپنی سرکاری ویب سائٹ پر شائع کر دی ہیں
