بھارتی ریاست کیرالہ میں ایک حیرت انگیز واقعہ دیکھنے کو ملا جہاں مزدوروں کو بارش کے پانی کو جمع کرنے کے لئے کھدائی کے دوران قیمتی زیورات اور سونے کے سکے برآمد ہوئے۔ بھارتی میڈیا کے مطابق، یہ مزدوروں کا گروپ ایک مہم کے تحت بارش کے پانی کو بچانے کے لئے کھدائی میں مصروف تھے کہ اچانک انہیں سونے کے سکے ملے۔
جب مزید کھدائی کی گئی تو مزدوروں کو ایک مٹی کا برتن بھی برآمد ہوا جس میں سونے اور چاندی کے سکے موجود تھے۔ اگلے دن اسی جگہ سے مزید پانچ چاندی کے سکے اور دو سونے کے زیورات بھی برآمد ہوئے۔
مزدوروں کا کہنا تھا کہ شروع میں انہوں نے برتن کو بم سمجھ کر خوف کے باعث پھینک دیا تھا لیکن جب برتن ٹوٹا تو ان میں موجود حیرت انگیز قیمتی زیورات نے سب کو حیران کر دیا۔ برآمد شدہ زیورات میں سونے کے 13 لاکٹ، 17 موتیوں کے ہار، پانچ قدیم انگوٹھیاں، چار تمغے (ممکنہ طور پر کاجو کے ہار)، ایک بالیوں کا سیٹ اور چاندی کے کئی سکے شامل تھے۔
مزید پڑھیں:درختوں کو بھی پینشن ملنے لگی
اس پورے واقعے کی اطلاع جلد ہی پولیس تک پہنچادی گئی تھی اور علاقہ پولیس کی ایک ٹیم نے موقع پر پہنچ کر قیمتی سامان کو اپنی حراست میں لے لیا۔ بعد میں، جمعہ کو انہیں ضلعی عدالت میں پیش کیا گیا جہاں عدالت نے محکمہ آثار قدیمہ کو مزید تحقیقات کرنے کا حکم دیا۔
محکمہ آثار قدیمہ نے برآمد شدہ سامان کی تصدیق کے لیے تحقیقات شروع کر دی ہیں۔ ایک اہلکار نے کہا کہ جس جگہ سے زیورات برآمد ہوئے ہیں، اس کی کوئی تاریخی اہمیت موجود نہیں ہے، اس لیے یہ اشیاء کسی کی ذاتی ملکیت بھی ہو سکتی ہیں۔ تاہم، تحقیقات کے بعد ہی کوئی حتمی نتیجہ سامنے آئے گا،محکمہ آثار قدیمہ کی جانب سے تحقیقات ابھی بھی جاری ہیں اور جلد ہی ان اشیاء کی اصل حقیقت سامنے آ جائے گی۔
