وزارت مذہبی امور نے اعلان کیا ہے کہ اسلامی نظریاتی کونسل کے 2023 کے حکم جس میں پاکستانی خواتین کو مرد سرپرست (محرم) کے بغیر حج کرنے کی اجازت دی گئی تھی کے باوجود بھی حج 2025 کے لیے رجسٹریشن کے لیے انہیں اپنے شوہر یا والدین کی رضامندی کی ضرورت ہوگی۔
حج پالیسی 2025 دستاویز کے مطابق حج 2025 کے لیے خواتین کے لیے کسی محرم کی ضرورت نہیں ہوگی تاہم اسلامی نظریاتی کونسل کے فیصلے کے مطابق، خواتین کو حج پر بنا محرم کے جانے کیلئے ایک حلف نامہ جمع کرانا ہوگا کہ ان کے والدین یا شوہر انہیں اجازت دی ہے، وہ قابل اعتماد خواتین کے گروپ میں ہیں، اور ان کی عزت کو کوئی خطرہ نہیں ہے۔
یہ فیصلہ نومبر 2023 میں اسلامی نظریاتی کونسل کی مشروط منظوری کے بعد آیا ہے، جس میں خواتین کو حج کے لیے بغیر محرم کے سفر کرنے کی اجازت دی گئی، بشرطیکہ کچھ شرائط پوری ہوں۔ ان شرائط میں اس بات کو یقینی بنانا شامل ہے کہ عورت کے ساتھ خواتین کا ایک قابل اعتماد گروپ ہو اور سفر کے دوران اس کی عزت کو کوئی خطرہ نہ ہو۔
اسلامی نظریاتی کونسل نے پہلے واضح کیا تھا کہ جعفریہ، مالکی اور شافعی مکاتب فکر کے مطابق، خواتین کو محرم کے بغیر حج یا عمرہ کرنے کی اجازت ہے تاہم یہ اجازت سے مشروط ہے۔
مزید پڑھیں:حکومت کا سرکاری حج آپریشن سے الگ ہونے پر غور شروع
سعودی حکومت نے 2021 سے حج اور عمرہ کے لیے سفر کرنے والی خواتین کے لیے محرم کی شرط کو بھی ختم کر دیا تھا، اس پالیسی کو بین الاقوامی سطح پر بڑھا دیا گیا تھا۔
حج 2025 کی دیگر شرائط :
نابالغوں کے حوالے سے، حج 2025 کی پالیسی میں یہ شرط رکھی گئی ہے کہ 12 سال سے کم عمر کے بچوں کو سعودی ضوابط کے مطابق حج میں شرکت کی اجازت نہیں ہوگی۔ مزید برآں، خصوصی شہریوں اور معذور درخواست دہندگان کو حج کے لیے سفر کرنے کے لیے ایک اٹینڈنٹ کے ساتھ ہونا ضروری ہوگا۔
وہ درخواست دہندگان جن کو عدالتی احکامات کی وجہ سے سفر کرنے سے روک دیا گیا ہے یا جن کا نام ایگزٹ کنٹرول لسٹ (ای سی ایل) میں ہے وہ حج کے لیے نااہل ہوں گے۔
سعودی حکومت کی طرف سے پاکستان کو کل 179,210 حج نشستیں الاٹ کی گئی ہیں، ملک کی حج پالیسی کے مطابق سرکاری اور نجی سکیموں کے درمیان مساوی تقسیم ہے۔
